Гюльнара Мягьямедова

 
Улихьна йигъари Дербентдиъ Дюн’яйин культурйирин ва динарин тарихдин музейиъ кавказдин халачачивалин машгьур искусствойиз бахш дапIнайи «Гугналан ккебгъну ядигариина» выставка ачмиш гъабхьну. Выставкайиз кюгьне халачйир адагъна. Дурарик китIнайи хьайин мурслин гугариинди каънайи накьишар Дагъустандин халкьарин кьисматарин китабарси урхуз шулу. Выставкайин гьякьнаан музейин мялуматарин гъуллугъну хабар тувра.

Гьаму хьадну музейиъ ачмиш дапIнайи выставка региондин культурайин мяналу гьядисйирикан саб ву. Выставкайиз П.С. Гьямзатовайин ччвурнахъ хъайи Дагъустандин шиклар зигбан искусствойин музейин, Этнический культурайин центрин, Табасаран драмайин театрин ва хусуси коллекционерарин фондариан хилариинди дурхнайи уткан халачйирин чешнийир адагъна. Халачйир жюрбежюр миллетарин устадари – аварари, гъумугъари, даргйири, лезгйири, табасаранари, азербайжанари, эрменйири ва Кавказдин жара халкьари – дурхнайидар ву.

 
Музейин директор, РД-йин Жямяаьтлугъ палатайин эксперт Диана Гьясановайи серенжемдин важиблувал къайд гъапIну: «Гьаму выставка насларин арайиъ айи гъяд ву. Мушваъ уч дапIнайи халачйир гизаф халкьарин, жюрбежюр деврарин вушра, дурар ихь ата-бабйирин рюгьну сатIи апIура. Саб девриан тмунуб девриз аьдатар гъахували миллетарин арайиъ мюгькам аьлакьа уьбхюра».

 
«Выставкайиъ айи гьарсаб халачи чIал аьгъдру тарихдин шагьид ву, – давам гъапIнийи Диана Гьясановайи. - Дидин накьишариъ тухмарин кьисматар, халкьдин шадвалар ва пашманвалар тIаъна. Гьаму халачйирин накьишар ахтармиш апIури, ухьу ихь бабариз аьгъю лишнарин чIал дубгъурахьа. Халачйир этнографияйин ва культурайин чIиви китабар ву. Дурари саб арандиъ айи Кавказдин гизаф халкьарин культурйириз гьюрмат апIуз улупура».
Серенжемдин аьхириъ выставкайин куратор, музейин выставочный отделин заведующий Андроник Мурадовра удучIвну гъулхнийи. Дугъу проектдикан, думу уьмриз кечирмиш апIбан паярикан ктибтнийи.

 
Музейин гъуллугъчи Татьяна Исмяиловайи уч духьнайидарихъди чав дюзмиш дапIнайи экскурсия гъубхнийи. Дугъу Дагъустандин ягъал дагълариъ уьрхюрайи чарвйиририлан хьа ултIубкъбалан хъюгъну, халачи арайиз фици гъюруш, ктибтнийи. Экскурсия гъабхурайири ктибтиганси, дишагьлийири халачийик гьарсаб гуг дюъйир урхури китIри гъахьну, гьаддиз дурар хизандин сюгьюрнан гьякларси гьисаб шулу.

Выставка 2026-пи йисан сентябрин аьхиризкьан давам хьибди. Халачйирин искусствойиин машгъул вуйидарихьан музейиз выставкайиз гъягъюз шулу.