Дагъустан Республикайин сагъламвалин министрди гъилиху Жамалудин Гьяжиибрагьимов Мягьячгъалайиъ Республикайин Вишневскийин ччвурнахъ хъайи клинический больницайин кIулиъ тяйин дапIна. Дидин гьякьнаан вахтназди региондин сагъламвалин министрин вазифйир тамам апIурайи Аьлиуьмар Аьгьмадовди ТАСС-диз мялумат тувну.

Жамалудин Гьяжиибрагьимов 1965-пи йисан Табасаран райондин Ккувлигъ гъулаъ бабкан гъахьну. Дугъу Ростовдин гьюкуматдин медицинайин институтдин медицинайин профилактикайин ляхнин факультет ккудубкIну. Чан зегьметнан рякъ 1994-пи йисан январин вазли Ростов-на-Дону шагьрин медицинайин гьяракатнан кюмек тувру станцияйиъ духтирди лихури ккебгъну.

 
Жамалудин Гьяжиибрагьимов 2018-пи йисан майихъан 2020-пи йисан декабризкьан Дагъустандин сагъламвалин министерствойин кIулиъ гъахьнийи. Дидиз улихьна думу Урусатдин ФСБ-йин идарайин гъурулушдин жюрбежюр гъуллугъариъ – военный медицинайин гъуллугънан начальникди, региондин УФСБ-йин медико-санитарный частнан начальникди гъилихнийи.

 
Гюрматлу Жамалудин Аьлиевич! Уву гьаму гъуллугъниин тяйин апIували республикайин кIулиъ айидарин ув’ин хъугъвал аливал улупура. Яв идара апIбан ляхнин тажрубайи, пишекарвалин устадвали республикайин варитIан аьхю больницайиъ агьалйириз туврайи медицинайин кюмек заан дережайиз удубчIву гъитур кIури, умуд киврача.

 
«Табасарандин нурар» газатдин редакцияйин коллективди Жамалудин Гьяжиибрагьимов ужуб гъуллугънаъ дерккбахъди кIваантIан тебрик апIури, дугъаз мюгькам сагъвал, ляхниъ хъуркьувалар ккун апIура.