Наргиз Гюлечова
Мартдин аьхирариъ ва апрелин эвелариъ республикайиъ гъургъу мархьари агьалйирин мал-мутмуйизси, региондин гъулан мяишатдизра аьхю зарар тувну. Набататчивалин, мардарвалин цирклиз хайлин зарар дубхьна. Нежбрарин хусуси мяишатариъ уьрхюрайи мал-къара шту гъубхну вая мурдал гъабхьну. Гьацдар мяишатариз ва кIул’инди вуйи хизанариз кюмек апIувал себеб вуди, Саратов, Волгоград, Ростов областариан ва Ставропольский крайиан Дагъустандиз жинснан 137 мал тувбанди гъахьнийи. Карантиндин ва ветеринарвалин ахтармишар гъахбан кьяляхъ малар яваш-явашди Дагъустандиз хура.

Дагъустандин зегьметкешариз туврайи маларин сабпи партия (30 кIул) июндин кьялариъди Хасавюрт райондин Адильотар гъулан агьалйирихьна гъурубкьнийи. Гьаддин кьяляхъ цIиб вахтналан сабсана жинснан мал-къарайин десте Саратовский областдиан Дагъустандиз гъахну.
Му рягьимлувалин акция зиихъ улупу регионариан вуйи малдарвалин мяишатарин кюмекниинди Урусатдин гъулан мяишатдин министерствойи тешкил гъапIуб ву.

 
Думу мяишатари, аьхю мархьарин натижайиъ мал-къарайихьан гъахи чпин гъарашугъариз кюмек вуди, гьавайиди, ужуб ерийин никк ккудубзру хюнар рягьимлувалин акцияйиинди тувну.
Гьаму йигъари 3-пи ражари республикайиз жара регионариан рягьимлувалин кюмек хъубкьна. Му ражари Дагъустандиз 64 кIул ккудузру хюнйир, кIирхъар ва жердар Ростовский областдиан ва Ставрополь крайиан гъахну. Му малар гизафси зарар гъабхьи Хасавюрт ва Лак районарин мяишатариз жара гъапIну.
Рягьимлувалин акцияйиинди Дагъустандиз хурайи малар игьтияж айи мяишатариз жара апIувал, региондин гъулан мяишатдин ва ипIру-убхъру сурсатарин министрин вазифйир вахтназди тамам апIурайи Шамиль Рамазановдин гюзчиваликкди гъабхура. Мархьар-селлери зарар туву мяишатариз кюмек вахтниинди хъубкьбан бадали, РД-йин гъулан мяишатдин ва ипIру-убхъру сурсатарин министерствойи чахьан шлуб вари апIура.