Гюльнара Мягьямедова
11-пи августди республикайин кIулиъ айи Федор Щукинди Дагъустандин гьюкуматдин техникайин университетдин ректор Назим Баламирзоевдихъди Военный урхбан центрин артмиш’валин месэлйир гьял гъапIну.

Центр 2024-пи йисан ДГТУ-йин бинайиин ачмиш гъапIуб ву. Душваъ «хьубдиз» урхурайи студентарихьан, чпин асас пишейихъди сабси, военный гьязурлугвалра гъадабгъуз шулу.

 
Гъи центриъ 200 касди урхура. Душваъ лазим вуйи оборудованиейихъди тямин дапIнайи хусуси метлебнан классар а, мялимарин штат тяйин дапIна, бязи аудиторйириз Урусатдин Игитарин ччвурар тувна. Проект РФ-дин оборонайин министерствойин ва образованиейинна илимдин министерствойин кюмекниинди уьмриз кечирмиш апIурайиб ву.
Тажруба айи мялимари студентариз яракьарихъди ляхин апIуз улупура, женгнан тактикайин дарсар кивра, деврин тIалабариз гъилигу лазерин оборудование ишлетмиш апIуз, БПЛА-йихъди ляхин апIуз улупура.

 
Курсантарихъди ватанпервервалин ляхинра гъабхура. Дурар региондиъ гъахурайи акцйириъ иштирак шула, хусуси метлеб айи дявдин операцияйин иштиракчйирихъди ва дурарин хизанарихъди гюрюшмиш шула.
Ректорин теклиф кьабул дапIну ДГТУ-йихъди багахьди таниш гъахьиФедор Щукинди вузди Дагъустандин жигьилариз тербия тувбак лайикьлу пай киврайиваликан ва центрин ляхин ужуди тешкил дапIнайиваликан гъапнийи.

Сентябрин вазли вуздиъ гьязур дапIнайи 33 сержант ва 66 рядовой деетиди. Гележегдиъ ДГТУ-йи офицерарра гьязур апIуз хъюгъди.