Дагъустандин хурагарин фестиваль гъабхьну
Наргиз Гюлечова
Ккудубшу гьяфтайин аьхиримжи шубуд йигъандин арайиъ Мягьячгъалайин СтIал Сулеймандин ччвурнахъ хъайи паркдиъ Дагъустандин туризмдинна халкьарин художествойин сяняаьткарваларин министерствойин ва Мягьячгъалайин администрацияйин кюмекниинди тешкил дапIнайи республикайин халкьарин аьдати ва гьаму деврин хурагариз бахш дапIнайи «Ирс» фестиваль кIули гъубшну.
Му фестивалиъ жюрбежюр хурагар гьязур апIуз 4 майдан жара дапIнайи. Гьарсаб майдандиин хурагариз бахш вуйи федералин «Битва на кухне» проектдиан 1 кьасабар ва гьарсар кьасабрихъди республикайиан вуйи медиаблогери ляхин апIурайи. Мидланра гъайри, му майднариин жюрийи ва эспертари чпин ляхин апIурайи.
Къайд дапIну ккундуки, цци му фестивалин дахилнаъди Гиннессдин рекордарин Китабдиз кIури, «Папаха. «ХинкIарин музей»» ресторанди, 500 литйир йикк гъубхьу жук ишлетмиш дапIну, варитIан гизаф кьадар чабан хинкIарра гъапIну. Guinness World Records эскпертари дурар официально варитIан гизаф вуйи хинкIар вуди гьисаб гъапIиш, му ляхин Дагъустандин гьаму деврин хурагар апIру тарихнан аьхю гьядиса гьисаб апIиди.
«Ирс» фестивалин тешкилатчи ва ресторатор Камиль Жахаевди къайд гъапIганси, му серенжемдин асас мяна Дагъустандин халкьарин аьдати хурагар насларихьан насларихьна тарагъуб ву.
«Му фестивали Мягьячгъала Урусатдин хурагарин маршрутдин саб пай вуйиб улупиганси, халкьарин аьдатар уьрхюрайи, пишекарвалин устадвал ва яратмишар айи йишвра вуйиб улупура», – гъапнийи Камиль Жахаевди.
Къайд дапIну ккунду, му серенжемдиз 35 агъзуртIан артухъ республикайин агьалйир ва хялар уч гъахьнийи. Узу зиихъ къайд гъапIганси, серенжемдиъ хурагар гьязур апIру 4 команда гьаму йигъарин арайиъ талитназ удучIвнайи. Командйирин арайиъ талитар гъахбаз улупнайи къайдайиинди, гьарсаб дестейигъян хураг - блогери гьязур дапIну ккундийи, хъа аьхю кьасабри, блогери хураг гьязур апIбан ляхин, чан гюзчиваликк ккади, аммаки, дидик дугъу тIубкьан кучну ккундайи. Кьюд йигъандин арайиъ хурагар гьязур апIбаъ аьхю кьасабар Богдан Козловдин ва блогер Эсмира Сяидовайин команда гъалиб гъабхьну. Гьамус 13 сентябри Москвайин ВДНХ-йин кIули гъябгъру гьаму проектдин финалиъ дурар Дагъустандиан вуйи командаси иштирак хьиди.