Зубайдат Шябанова

 
Августдин 8-пи йигъан Табасаран райондин Хючна гъулаъ Кьалухъ Мирзайин ччвурнахъ хъайи спортдин дараматдиъ Урусатдин Игит, пияда къушмарин кIул’инди вуйи 40-пи гвардейский бригадайин танкарин батальондин командир, гвардияйин майор, ТIаттил гъулан вакил Руслан Къурбановдин гьюрматназ тешкил дапIнайи юкьяр дисбаан республикайин II турнир кIули гъубшну.

Серенжем Урусатдин халкьарин сабвалин Йисандин дахилнаъди райондин администрацияйи тешкил гъапIнийи. Талитариъ иштирак хьуз Табасаран, Хив, Дербент, СтIал Сулейман, Гъяйтагъ районариан ва Мягьячгъала, Дербент, Дагъустандин Огни шагьрариан 2010-2019-пи йисари бабкан гъахьи 150-тIан артухъ спортсменар иштирак гъахьну. Дурар гъагънан 15 категорияйиз жара гъапIну.
Талитар тамашачйири лап маракьлуди кьабул гъапIнийи. Хяларин ва тамашачйирин арайиъ РД-йин государственный секретарь Нюсрет Уьмаров, Табасаран райондин глава Мягьямед Къурбанов, Дагъустандин Огни шагьрин глава Замир Гьяжимурадов, Урусатдин Игит Руслан Къурбанов, хусуси метлеб айи дявдин иштиракчйир, меценатар, жямяаьтлугъ тешкилатарин вакилар айи.
«Урусатдин Игит Руслан Къурбановдин гьюрматназ вуйи турнир му гьарсаб гъагънан категорияйиъ варитIан дирбаш спортсменар ашкар апIурайи аьдати талитарси, ихь живанариз жандин рюгь кьувватлу ва хасият мюгькам хьуз гъитрайи майданра ву. Фицики гъалибвал гъадабгъбан бадали, гьарсар спортсменди чан бажаранвал, мумкинвалар, хасият, сабур ва кьастнан кьувват улупну ккунду. Гьаму талитари республикайин спортивный календариъ лайикьлу йишв бисура», – гъапну турнир ачмиш апIури Мягьямед Къурбановди.

 
Нюсрет Уьмаровди чан улхбаъ, Руслан Къурбанов учв юкьяр дисбаан спортдин мастер ва жигьиларизна живанариз лайикьлу намуна вуйиваликан ктибтури, вари иштиракчйириз маракьлу талитар ва гъалибвалар ккун гъапIну.

 
Руслан Къурбановди инсандин уьмриъ спортдин важиблуваликан ктибтну ва вари иштиракчйириз заан хъуркьувалар, гъазанмиш гъапIу гъалибвалариин дийийигъуб, гележегдиъ, хъана заан талитариъ иштирак шули, заан йишварин сагьибар хьуб ккун гъапIну.
Талитарикан чан фикрар ич сюгьбатнаъ Табасаран райондин бицIидаринна живанарин спортдин 4-пи нумрайин мектебдин директор Мягьямад Исмяиловдира ачмиш гъапIну. Дугъу туву мялуматариинди, талитариъ сабпи йишвар варитIан гизаф Табасаран райондин командайихьан гъадагъуз гъабхьну. Тяйин дапIнайи 15 категоряйиъ ихь спортсменари 9 гъизилин йишвар гъадагъну. Кьюбпи йишв’ин Мягьячгъала ва шубубпи йишв’ин Дагъустандин Огни шагьрарин командйир ал.

Талитариъ гъалиб гъахьидариз ва призерариз кубокар, медалар, дипломар, оргкомитетди тяйин дапIнайи пулин премйир тувну. Сабпи йишвар гъадагъдар гьацира чемпионвалин чIуларин сагьибар гъахьну.