Наргиз Гюлечова

 
20-пи июли Мягьячгъалайин «Урусат - йиз тарих» тарихнан паркдиъ Сабвуйи гьюкуматдин имтигьяндиан (ЕГЭ) 100 балл гъадагъу республикайин мектебар ккудукIдар къаршуламиш гъапIну. Дагъустандин «гъизилин» жигьиларихъди гюрюшмиш гъахьидарин арайиъ региондин Главайин вазифйир вахтназди тамам апIурайи Федор Щукин, республикайин Халкьдин Собраниейин председатель Заур Аскендеров ва Правительствойин председатель Мягьямад Рамазанов айи.

ЕГЭ-йиан 100 балл гъадагъу Дагъустандин выпускникариз ва Вариурусатдин олимпиадйириъ иштирак гъахьи баяр-шубариз 100 агъзур манат тувра. Думу ужуб аьдат 2021-пи йисхъанмина давам шулайиб ву.
Къайд дапIну ккундуки, урхбан 2025-2026-пи йисари республикайин 52 выпускникди ЕГЭ 100 баллиз тувну, хъа кьюрсана мектебариъ урхурайидари, Урусатдин мектебариъ урхурайидарин арайиъ гъуху олимпиадйириъ пешкешнан йишвар гъадангъну. 100 агъзур манатдин премия, ЕГЭ-йиан 100 балл гъадагъдаризси, 2 имтигьяндиан 95-дилан 99 балл гъадагъдаризра ва гьадму кьадар премия Вариурусатдин олимпиадйириъ пешкешнан йишвар гъадагъдаризра ва гьадрар гьязур гъапIу мялимаризра тувра.
Дарпиди гъибтуз шулдар. Дагъустандин тарихдиъ сабпи ражари вуди Каспийск шагьриъ айи Республикайин образованиейин центриъ урхурайи Гюльмира Гьянифаевайи шубуб дарснаан вуйи имтигьнар гьарса-саб 100 баллиз тувну.

 
Ужудар натижйир улупу выпускникарихъди вуйи сюгьбатнаъ Федор Щукинди республикайиъ «Дагъустандин команда» ччвур тувнайи, кадрйир гьязур апIру программа уьмриз кечирмиш апIуз планламиш дапIнайибдикан мялум гъапIну.

 
«Заан образование гъадабгъну, лихбан тажруба хьубан кьяляхъ, учу учвуз ккилигурача. Дагъустандин гележег ичв хилиъ а. урхбан кьяляхъ хулаз хъадакну гъюб, думу кьяляхъ шулайивал дар. Думу улихь гам алдабгъну, «Дагъустандин командайин» дахилназ гъюрайивал ву. Учу гъи учвусдар таза фикрин жигьилариз ккилигурача. Фицики гъи, Дагъустандиз ляхин апIуз юкIв хъайи, гьаму деврин фикир айи, зигьимлу ва кьувватлу пишекрар лазим ву. Му программа анжагъ гьацдар касар ашкар апIбан бадали уьмриз кечирмиш апIурайиб ву. Му проект багъри Ватандин уьмур ужуб терефназди дигиш апIуз ва алахьурайи читин месэлйир гьял апIуз вуйи проект ву. Учву Дагъустандиъ вая жара регионариъ вуз ккудубкIишра, программайиъ иштирак хьуз мумкинвал ачвуз

— Автор», – аьлава гъапIну Федор Щукинди.

 
Ихь региондин 100 агъзур манатдин премия улупнайи сертификатар 90 выпускникариз ва кьюр мялимдиз гьаруриз тувну. Сертификатар урхбаъ ужудар натижйир улупу баяр-шубари Республикайин главайин хилариан гъадагъну.
Къайд дапIну ккундуки, цци ЕГЭ-йиан 100 балл гъадагъу выпускникарин кьадар сачтIан кьюб ражари артухъ гъабхьну. Ккудубшу йисан республикайиъ 100 баллиз ЕГЭ тувдар анжагъ 33 выпускниктIан дайи. Гьаддихъди сабси цци 95-дилан 99-диина баллариз кьюб имтигьян туву выпускникарра артухъ гъахьну. Дурарин кьадар 33 кас ву.

Серенжемдин аьхириъ, мушваъ айи выпускникаризси, имбуну вари иштиракчйиризра пешкешди «Дагъустандин командайин» футболкйир тувнийи.